Vonast eftir sátt við Elliðavatn

Orkuveita Reykjavíkur bindur vonir við að sátt náist við eigendur sumarhúsa sem fyrirtækið vill að hverfi af leigulóðum á landi hennar við Elliðavatn. Eins og fram hefur komið í Fréttablaðinu sendi lögmaður hluta húseigendanna Orkuveitunni bréf þar sem kröfum og sjónarmiðum fyrirtækisins er hafnað.

„Það er stefna OR að sumarhúsabyggðin víki af vatnsverndarsvæðinu með tíð og tíma enda skuli verndun drykkjarvatns fyrir höfuðborgarsvæðið hafa forgang fram yfir hagsmuni einstaklinga. Fyrirtækið vinnur enn að því markmiði og vonast til að sem best sátt geti náðst við sem flesta húseigendur,“ segir Eiríkur Hjálmarsson, upplýsingafulltrúi OR.