Ógnvænlegir yfirburðir PSG sem setti nýtt met

Paris Saint-Germain heldur áfram að drottna yfir frönsku 1. deildinni í fótbolta, en liðið vann Lorient í gærkvöldi á heimavelli sínum í París, 3-1.

Edison Cavani, sem hefur verið orðaður við Manchester United, skoraði fyrsta mark PSG áður en gestirnir jöfnuðu metin. Mörk frá Zlatan Ibrahimovic og Layvin Kurzawa tryggðu meisturunum svo þrjú stig.

Með sigrinum í gær setti Parísarliðið nýtt met með því að tapa ekki í 33 leikjum í röð í frönsku 1. deildinni, en liðið hefur verið ósnertanlegt undanfarin misseri.

Yfirburðir PSG eru svo miklir að eftir aðeins 24 umferðir af 38 er liðið með 24 stiga forskot á Monaco á toppi deildarinnar.

Mun styttra er fyrir Monaco í fallbaráttuna heldur en upp í toppsætið því ekki munar nema 15 stigum á Monaco í öðru sætinu og Montpellier sem er með 25 stig í 18. sæti deildarinnar.

PSG er ekki enn búið að tapa leik í deildinni í vetur. Það er búið að vinna 21 leik og gera þrjú jafntefli, en næst koma Monaco, Nice og Caen öll með ellefu sigra.

Ef fram heldur sem horfir verður Parísarliðið meistari jafnvel í næsta mánuði.