Leigusali dæmdur til að endurgreiða leigu og þrif á mygluðu innbúi

Veturinn 2011 til 2012 bjó ungt par með ungbarn á Ásbrú. Allan veturinn var fjölskyldan veik og þá sérstaklega litli drengurinn sem þreifst ekki og var alltaf sljór til augnanna.

Sjá einnig: Var farin að halda að barnið væri greindarskert 

Í ljós kom að myglusveppur var í íbúðinni, heilbrigðiseftirlitið dæmdi íbúðina óíbúðarhæfa og fjölskyldan flutti út. En drengurinn gat ekki verið í kringum búslóðina sem hafði verið í íbúðinni án þess að verða veikur á ný.

Þegar amman, Bergljót, komst að því að veikindin voru að mannavöldum og enginn vilji væri hjá leigufélaginu Ásabyggð til að bæta fyrir skaðann ákvað hún að fara í mál gegn leigufélaginu. Fjölskyldan vann málið fyrir hæstarétti í gær.

Þar er Leigufélagið dæmt til að endurgreiða um eins og hálfs mánaðar leigu og tæplega tólf hundruð þúsund krónur til að þrífa búslóðina. Bergljót er sátt við sigur en ósátt við að búslóðin sé ekki að fullu bætt.

„Ég er mjög ósátt við að þau eru ekki látin njóta vafans, þar sem þau eru búin að veikjast og búa í þessu," segir Bergljót og bendir á að fjölskyldan eigi enn erfitt með að vera inni í húsum þar sem vottur af myglu er. „Þau munu aldrei geta notað þessa búslóð. Henni verður bara fargað. Og ekki munum við selja öðrum þessi húsgögn. Það myndi ég aldrei gera. Ég óska engum að þola það sem þau hafa þurft að þola," segir hún. 



Í greinagerð sveppafræðings sem var lögð fyrir dóm segir að tilraunir sýni að ekki takist að hreinsa allt sveppa- og bakteríuefni úr búslóðum og því sé mikil hætta á að barnið veikist aftur sé það í sama rými og húsbúnaðurinn.



Í yfirmatsgerð skipaðra matsmanna af dómi segir samt sem áður að þeir álíti að vönduð hreinsun dugi alla jafna til að fjarlægja ónæmisvaka nægilega vel.

Bergljót er ósátt við þessa niðurstöðu matsmanna. Ég lít svo á að einn af matsmönnum eigi hagsmuni að gæta. Hann er aðili sem gefur sig út fyrir að hreinsa búslóðir sem hafa lent í myglusveppum," segir hún og vísar til meindýraeyðirs sem skipaður var sérfræðingur í málinu. 

Gunnar Ingi Jóhannsson, lögmaður fjölskyldunnar, segir dóminn þó hafa mikla þýðingu því hann skýri réttarstöðu leigjenda sem hefur verið mikil óvissa um hingað til.  

 

„Til dæmis er leigusalinn í þessu tilviki mjög stór leigusali, með margar íbúðir til leigu. Hann ber ríka ábyrgð. Nú er staðfest að hann sýndi af sér vanrækslu við viðhald húsnæðis og þar með ber hann ábyrgð gagnvart leigjendum.“

 

Gunnar Ingi segir mörg svipuð mál vera á sínu borði. „Það hefur töluverður fjöldi fólks leitað til mín og meðal annars á þessu svæði, á Ásbrú. Þetta fólk hefur verið að bíða eftir niðurstöðu í þessu máli. Og nú þarf væntanlega ekki að reka þau mál fyrir dómssal. Þessi dómur verður leiðbeinandi fyrir mörg þeirra," segir Gunnar Ingi.