Formannsframbjóðandi Samfylkingarinnar vill leggja flokkinn niður

Magnús Orri Schram sem er í framboði til formanns Samfylkingarinnar leggur það til í aðsendri grein í Fréttablaðinu í dag að stofnuð verði ný stjórnmálahreyfing fyrir flokksfólk Samfylkingarinnar. Segir Magnús Orri að hann muni beita sér fyrir því að þetta verði gert nái hann kjöri sem formaður flokksins en allsherjarkosning verður um nýjan formann fyrir landsfundinn sem fer fram fyrstu helgina í júní.

Í grein sinni í Fréttablaðinu segir Magnús Orri meðal annars:

„Ég vil að við stefnum að því að stofna nýja nútímalega stjórnmálahreyfingu. Sem formaður Samfylkingarinnar mun ég hefja samtal við aðra stjórnmálaflokka og fólk utan flokka, um mótun nýrrar hreyfingar með áherslu á auðlindir í almannaþágu, umhverfisvernd, nýja stjórnarskrá, jöfn tækifæri, öflugt velferðarkerfi og samkeppni í heilbrigðu atvinnulífi. Staðan í stjórnmálum krefst þess að við séum hugrökk, köstum burt klyfjum fortíðar og séum tilbúin til að stíga saman næsta skref í sögu jafnaðarfólks á Íslandi.“

Í nýrri skoðanakönnun fréttastofu 365 um fylgi stjórnmálaflokka sem birt er í Fréttablaðinu í morgun mælist Samfylkingin með afar lítið fylgi, eða 7,4 prósent. Árni Páll Árnason, núverandi formaður Samfylkingarinnar, hyggst ekki gefa kost á sér að nýju sem formaður en auk Magnúsar Orra eru þingmennirnir Oddný Harðardóttir og Helgi Hjörvar í framboði til formanns sem og Guðmundur Ari Sigurjónsson.