Agüero tryggði Manchester City sigur og annað sætið

Manchester City er komið upp í annað sæti ensku úrvalsdeildarinnar eftir 1-0 útisigur á Sunderland í kvöld.

Argentínumaðurinn Sergio Agüero var hetja liðsins en hann skoraði eina mark leiksins snemma í fyrri hálfleiknum.

Þetta var aðeins annar útisigur Manchester City liðsins í deildinni í síðustu níu leikjum liðsins utan Ethiad-leikvangsins.

Sergio Agüero kom Manchester City í 1-0 eftir sextán mínútna leik en hann hafði áður fengið gott færi til skora fyrsta mark leiksins. Agüero fékk boltann eftir hálfmisheppnað skot Jesús Navas.

Agüero gat bætt við öðru marki tólf mínútum síðar og Manchester City var mun sterkara liðið.

City-menn máttu þó þakka fyrir það að fá ekki á sig jöfnunarmark fyrir hálfleik. Emanuele Giaccherini fór illa með algjört dauðafæri eftir aukaspyrnu á 34. minútu og mínútu fyrir hálfleik fengu heimamenn í Sunderland tvö dauðafæri í röð, fyrst varði Joe Hart frá Jermain Defoe og svo skaut Billy Jones í stöngina úr frákastinu.

Manchester City hélt velli og landaði síðan sigrinum eftir rólegan seinni hálfleik.