Spilar Totti aftur fyrir Roma?

Það reynir á James Pallotta, forseta Roma, næstu daga eftir að þjálfari Roma og stærsta stjarna liðsins fóru að rífast.

Francesco Totti kvartaði undan hegðun þjálfarans, Luciano Spalletti, í viðtali um helgina. Sagðist ekki njóta nægrar virðingar hjá honum. Þeir ættu lítil samskipti og hann fengi ekki að spila.

Spalletti tók þessum ummælum illa og henti Totti úr leikmannahópi liðsins fyrir leikinn gegn Palermo á sunnudag. Hann vannst 5-0 og Roma hefur nú unnið fimm leiki í röð. Þeir ræddust ekki við á æfingu daginn eftir og ólíklegt að Spalletti vilji nota Totti í kjölfarið.

„Báðir hafa brugðist við þessu ástandi. Ég var hissa á ummælum Totti en skil að hann sé pirraður á því að spila ekki meira,“ sagði Pallotta.

„Ég átti ekki von á þessu en Totti er stórkostlegur leikmaður sem hefur ritað nafn sitt gylltu letri í sögubækur félagsins. Svo er það þjálfarinn sem er einn sá besti í heimi. Ég mun setjast niður með Totti og fleirum á næstunni og reyna að leysa þetta mál.“

Samningur hins 39 ára gamla Totti rennur út næsta sumar. Hann hefur lýst yfir áhuga á að halda áfram en Spalletti virðist ekki hafa áhuga á að nota hann.