Fasteignasalan sem annaðist sölu á Ásmundarsal: Öxlum ábyrgð ef við höfum sannarlega valdið tjóni

„Við hörmum þessa stöðu sem er komin upp,“ segir framkvæmdastjóri fasteignasölunnar Valhallar, Ingólfur Geir Gissurarson, en fasteignasalan annaðist söluna á Ásmundarsal á Freyjugötu. Það voru fjárfestarnir og hjónin Sigurbjörn Þorkelsson og Aðalheiður Magnúsdóttir sem keyptu húsið af Alþýðusambandi Íslands fyrir 168 milljónir króna.

Gylfi Arnbjörnsson, forseti ASÍ, segir í samtali við Morgunblaðið í dag að mistök hafi orðið til þess að hæsta tilboðinu í húsið hafi ekki verið tekið. Er haft eftir Gylfa að mistökin hafi falist í því að ekki bárust upplýsingar um þau tilboð sem gerð voru með réttum hætti, málið sér til skoðunar og að það sé litið alvarlegum augum.

Ingólfur Geir Gissurarson segir fasteignasöluna ætla að skoða málið ofan í kjölinn. „Og við munum sannarlega bera ábyrgð ef við höfum sannarlega valdið tjóni. Það er alveg hreint og klárt og við munum ekki skorast undan því. Við viljum ekki að seljandinn fari sár frá borði.“

Gylfi Arnbjörnsson ítrekaði við Morgunblaðið að þrátt fyrir að ASÍ sé með málið til skoðunar þá muni kaupsamningurinn við Aðalheiði og Sigurbjörn standa.

Líkt og kom fram fyrr borguðu hjónin 168 milljónir króna fyrir Ásmundarsal en fasteignamat hússins er 76,7 milljónir króna. Nýju eigendurnir lögðu áherslu á að viðhalda list- og menningarhlutverki hússins þegar tilkynnt var um kaupin en Samband íslenskra myndlistarmanna lýsti yfir áhyggjum af því að húsið yrði ekki áfram nýtt undir slíka starfsemi.