Líbíuher gerir loftárásir á höfuðborg landsins

Flugher þeirrar Líbíustjórnar sem viðurkennd er á alþjóðavettvangi hefur gert loftárásir nærri líbísku höfuðborginni Trípolí. Stjórnin er sjálf með aðsetur í borginni Benghazi, en önnur ríkisstjórn ræður nú ríkjum í Trípolí.

Saqir El-jaroshi, talsmaður flughersins, segir árásirnar hafa beinst að Maitiga-flugvellinum og flugvellinum í Misrata.

El-jaroshi segir árásirnar vera svar stjórnarinnar við þrim árásum sem gerðar voru á flugvöllinn í Zintan. Sveitir Líbískrar dögunar, hóps sem tók yfir Trípolí á síðasta ári og kom á eigin stjórn, stóðu fyrir þeim árásum.