Fordæma misnotkun á skjaldkirtilslyfjum

Skjöldur, félag um skjaldkirtilssjúkdóma, fordæmir þá misnotkun á skjaldkirtilslyfjum sem greint hefur verið frá að undanförnu. Í tilkynningu frá félaginu segir að lyfið eigi einungis að taka í samráði við lækni því neysla lyfjanna geti annars haft ófyrirséðar afleiðingar fyrir heilsu fólks.

Í fréttum Stöðvar 2 í gær var sagt frá því að fólk sem glímir við vanvirkni í skjaldkirtli sé reglulega beðið um að selja lyf sín. Þá hafi einkaþjálfarar mælt með að fólk auki skammtinn til að ná betri árangri í líkamsrækt. Tvo tilvik urðu á Landspítalanum nýverið þar sem misnotkun lyfsins olli alvarlegri hjartabilun og hjartastoppi.

Félagið leggur því áherslu á að lyfin séu ekki ætluð fullfrískum einstaklingum, því um sé að ræða hormónalyf sem hafi áhrif á alla starfsemi líkamans, ekki einungis þá starfsemi sem óskað er eftir hverju sinni.

Frétt Stöðvar 2 frá því í gær má sjá í spilaranum hér fyrir neðan.