Þurrkatíð og háar skuldir plaga íbúa Púertó Ríkó

Þurrkar og skuldir þjaka bandaríska sjálfstjórnarsvæðið Púertó Ríkó í Karíbahafi um þessar mundir. Ríkið fór í greiðslufall í upphafi mánaðar og íbúarnir búa við alvarlegan vatnsskort.

Þurrkarnir eru einir þeir verstu í sögu Púertó Ríkó og hefur lítið sem ekkert rignt undanfarna mánuði á meðan mikill hiti hefur verið.

Í gær var þrjátíu gráða hiti í höfuðborginni, San Juan.

Pagan Zunania, fjölmiðlafulltrúi vatns- og skólplagnanefndar eyjunnar, sagði í gær að um 400 þúsund íbúar byggju við mikinn vatnsskort, rúmlega tíu prósent íbúa. Rigning á svæðinu í júlímánuði var um þriðjungur meðaltals undanfarinna ára.

Íbúar hafa sumir hverjir þurft að sætta sig við strangar reglur um vatnsnotkun. Lokað hefur verið fyrir vatnslagnir til heimila í tvo sólarhringa í senn og opnað í einn þar á eftir. Þó er hótelum og öðrum aðilum ferðaþjónustunnar hlíft við aðgerðunum.

„Frá því vatnsskorturinn kom upp og ríkisstjórnin kynnti aðgerðir til að stemma stigu við honum hafa hótel starfað á eðlilegan hátt,“ sagði Carlos Martinez, meðlimur samtaka hótela í Púertó Ríkó. Martinez bætti því við að þurrkarnir hefðu ekki enn haft alvarleg, neikvæð áhrif á ferðaþjónustu á eyjunni. Breytingar á veðurfari eru ekki í vændum þar.

Til að bæta gráu ofan á svart situr landið í skuldafeni. Þann fjórða ágúst síðastliðinn stóð eyjan ekki í skilum við lánardrottna sína og fór í greiðslufall en skuldir eyjunnar hafa farið vaxandi undanfarin ár, sér í lagi eftir að skattaafsláttasamningur sem eyjan hafði notið féll úr gildi.

Skuldir Púertó Ríkó nema um hundrað prósentum vergrar landsframleiðslu og tekjurnar duga ekki fyrir afborgunum, en skuldir nema nærri tíu þúsund milljörðum króna.

Skuldastaðan og hið eiginlega greiðslufall veldur eyjarskeggjum höfuðverk þar sem eyjan er hvorki sjálfstætt ríki né sambandsríki Bandaríkjanna. Því er óljóst hvaða lagalegu úrræði eru fyrir hendi.

Íbúar Púertó Ríkó kusu um lagalega stöðu eyjunnar árið 2012 en þá vildu sextíu prósent kjósenda að Púertó Ríkó yrði formlega eitt ríkja Bandaríkjanna.