"Þetta er gleðidagur fyrir þjóðina alla"

Alls bárust fjögur tilboð í fullnaðarhönnun meðferðarkjarna vegna nýbygginga við Landspítalann. Lægsta tilboðið átti Corpus sem bauð tæpa 1,4 milljarða króna. Er það rúmlega helmingur af upphaflega áætluðum kostnaði, sem hljóðaði upp á rúma 2,7 milljarða.

Corpus hópurinn samanstendur af fjórum fyrirtækjum, en þau eru Basalt arkitektar, Hornsteinar arkitektar, verkfræðistofa Jóhanns Indriðasonar og VSÓ ráðgjöf



Meðferðarkjarninn er einn af fjórum nýbyggingum sem áformað er að reisa við Hringbraut og jafnframt sú stærsta þeirra, eða 58.500 m². Byggingin mun vera á sex hæðum auk kjallara og mun hún jafnframt tengjast öðrum byggingum á Landspítalalóðinni innbyrðis.

„Þetta er gleðidagur fyrir þjóðina alla" segir Páll Matthíasson, forstjóri Landspítalans en jafnframt telur hann samninginn skipta Landspítalann gífurlegu máli því nú sé hægt að vinna að lokahönnun spítalans.