Bestu liðin spila öll á Hlíðarenda í dag

Knattspyrnuáhugafólk fær flott tækifæri í dag til að sjá framtíðarstjörnur kvennafótboltans spila um sæti í úrslitaleik Evrópumótsins þegar báðir undanúrslitaleikir EM 17 ára landsliða kvenna fara fram á Valsvellinum við Hlíðarenda.

Klukkan eitt mætast Spánn og Frakkland og klukkan sjö spila síðan Sviss og Þýskaland.

Í liði Þjóðverja er meðal annars hin frábæra Stefanie Sanders sem skoraði 6 mörk í riðlakeppninni og í liði Spánar er hin skeinuhætta Lucía García sem skoraði 3 af 4 mörkum sínum í riðlakeppninni í 4-0 stórsigri Spánar á Þýskalandi.

Fyrir leikina verða knattþrautir og hoppukastali í boði fyrir krakka, landsliðskonur mæta á svæðið, boðið verður upp á grillaðar pylsur og ávaxtasafa og hægt verður að taka þátt í happdrætti þar sem vinningar eru miðar á landsleiki með A-landsliðum kvenna og karla. Dagskrá hefst einum og hálfum tíma áður en leikir hefjast.

Aðgangur á báða undanúrslitaleikina er ókeypis.