Helmings fækkun sakamála

Sakamálum sem koma til kasta héraðsdómstólanna hefur fækkað um helming milli áranna 2011 og 2014. Ný sakamál fyrir héraðsdómi voru 2.597 árið 2014 en 5.122 árið 2011.

Jón H.B. Snorrason, aðstoðarlögreglustjóri Lögreglunnar á höfuðborgarsvæðinu, segir ástæðuna fyrir fækkun sakamála helst aukið eftirlit með síbrotamönnum. „Við höfum verið með mjög öflugar aðgerðir í gangi til að stemma stigu við að síbrotamenn geti haldið áfram óáreittir. Síbrotamenn fá miklu minna svigrúm en áður,“ segir hann.

Jón telur mikinn árangur hafa náðst í baráttunni gegn síbrotamönnum síðustu sex ár. „Almennum hegningarlagabrotum hefur fækkað talsvert og í sumum flokkum um alveg upp í þrjátíu prósent.“

Aukið eftirlit sé með rofi síbrotamanna á reynslulausn. Þá sé síbrotagæslu beitt í auknum mæli þar sem reynt sé að hraða afgreiðslu í dómskerfinu þegar menn með langan sakaferil brjóta af sér.

Jón segir brotastarfsemi á borð við viðskipti með ólöglegan varning, fjársvikamál og kynferðisafbrotamál hafa í auknum mæli færst á veraldarvefinn. Það geti átt þátt í að skýra hvers vegna sakamálum hafi fækkað, enda kalli slík brot á breytt verklag hjá lögreglu. „Lögreglan þarf að koma sér upp þekkingu og færni þar,“ segir Jón.

Einnig geti frumkvæðismálum lögreglunnar hafa farið fækkandi í niðurskurði síðustu ára. Jón tekur þó fram að lögð sé áhersla á að sinna öllum málum sem koma inn á borð lögreglunnar.

Símon Sigvaldason, formaður dómstólaráðs, segir að eðli og umfang dómsmála hafi breyst verulega frá hruni. „Við fórum að kljást við annars konar mál, bæði einkamál og sakamál. En eftir því sem lengra líður frá hruni eru menn búnir að útkljá ýmis álitaefni sem tengjast hruninu og málum hefur þá fækkað hlutfallslega í samhengi við það,“ segir Símon.