Endurhæfingarýmum á Hrafnistu lokað

Tuttugu endurhæfingarrýmum verður lokað á Hrafnistu í Reykjavík 1.maí næstkomandi og hefur fimm manns verið sagt upp. Skjólstæðingar í endurhæfingu búa margir í eigin húsnæði enn og halda sér við með daglegri komu á Hrafnistu eða styttri dvöl. 

Samningar náðust ekki við ríkið um að halda áfram endurhæfingunni. Markmiðið með henni er að lengja sjálfstæða búsetu eldra fólks, með iðjuþjálfun, hjúkrunarþjónustu og sjúkraþjálfun. Í staðinn verður einfaldara hvíldarúrræði sett á fót.

„Er núna allt önnur"

Amalía Jóna Jónsdóttir er 79 ára og býr ein í íbúð sinn í Grafarholtinu. Hún hefur dvalið um hríð á Hrafnistu og segir þjónustuna sig öllu máli skipta. „Þetta skiptir bara öllu máli. Ég fór í uppskurð á mjöðm og heilsan bara hrundi gjörsamlega og ég var bara bundin inni og vildi helst bara alltaf vera í rúminu. Hætti að geta verslað og þurfti að fá fólk til að aðstoða mig við böð og annað. Svo dreif læknirinn minn í því að ég færi hingað og ég er bara allt önnur manneskja",sagði Amalía í fréttum Stöðvar 2 í kvöld.

Amalía getur notað morgunleikfimi á staðnum og tækjasal þar sem hún segir að starfsfólkið sé einstaklega faglegt. „Þar er ég í rafmagnsmeðferð á bakinu og fótunum, fæturnir voru bara alveg búnir, bara fúnir. Nú er ég farin að ganga út um allt og er bara að fara heim eftir viku og lít bara björtum augum á tilveruna", segir hún.  

Ekki bara lokuð inni í rúmi 

Amalía er ekkja og kallar ekki allt ömmu sína ef maður má segja þannig, hún er fyrstu kvenkyns fangavörður hér á landi og vann sem slíkur í 33 ár auk þess að eignast þrjár dætur. Henni líst illa á lokunina og myndi nýta sér hana meira ef hún stæði til boða áfram. "Heldur betur, maður þarf að vera í stöðugri þjálfun þegar maður fer að eldast. Það er bara númer eitt, tvö og þrjú að eldra fólk geti tekið þátt í lífinu, sé ekki bara lokað inni í rúmi", bætti hún við.

Lokun endurhæfingarýmanna mun ekki spara neytt heldur leggjumst við bara frekar inn á spítala, sagði Róbert Sigmundsson, 89 ára sem dvelur um hríð í endurhæfingunni en býr annars einn á Skúlagötu í Reykjavík og sem Stöð 2 ræddi einnig við í heimsókn á Hrafnistu.