Kristinn nálægt því að skora og leggja upp mark í fyrsta leik | Myndband

Kristinn Steindórsson og félagar hans í Columbus Crew þurftu að sætta sig við tap, 1-0, á útivelli gegn Houston Dynamo í fyrstu umferð 20. leiktíðarinnar í MLS-deildinni í fótbolta í nótt.

Columbus-liðið var mikið betri aðilinn í leiknum. Það var með boltann ríflega 60 prósent leiksins og átti sex skot á markið en inn vildi boltinn ekki.

Markalaust var í hálfleik, en eftir fimm mínútur í seinni hálfleik var Kristinn nálægt því að leggja upp mark. Hann sendi þá kamerúnska miðjumanninn Tony Tchani í gegn með flottri sendingu eftir veggspil en Tyler Deric í marki Houston varði af stuttu færi.

Deric átti eftir að reynast Columbus-mönnum erfiður ljár í þúfu. Hann varði tveimur mínútum seinna skalla frá Kei Kamara af fjögurra metra færi. Alveg mögnuð markvarsla.

Markvörðurinn var ekki hættur því hann kom í veg fyrir að Kristinn Steindórsson skoraði sitt fyrsta mark í MLS-deildinni í sínum fyrsta leik með annarri magnaðri markvörslu.

Kristinn átti þá viðstöðulaust skot eftir fyrirgjöf frá hægri en Deric skellti sér í grasið og stýrði boltanum út fyrir stöngina.

Deric, sem er 26 ára gamall, var fyrsti uppaldi leikmaðurinn í sögu Houston Dynamo til að spila leik fyrir aðaliðið árið 2010. Hann var þá jafnframt aðeins annar leikmaðurinn í sögu MLS-deildarinnar (stofnuð 1996) sem komst úr unglingaakademíu í aðallið félags.

Markvörslur Deric skiluðu sér svo sannarlega. Það var í næstu sókn eftir færið hjá Kristni sem heimamenn skoruðu eina mark leiksins.  Það gerði enski framherjinn Giles Barnes með föstu skoti upp í þaknetið úr teignum. Varnarleikur gestanna í aðdraganda marksins var þó ekki til útflutnings.

Þetta mark tryggði Houston sigurinn, 1-0. Kristinn spilaði 80 mínútur áður en honum var skipt af velli. Hann hafði hægt um sig í fyrri hálfleik en var mjög góður í þeim síðari og hefði með smá heppni getað skorað eitt og lagt upp annað.

Columbus Crew spilar næstu tvo leiki á heimavelli. Það mætir Jozy Altidore og félögum í Toronto FC eftir viku og svo stórliði New York Red Bulls viku síðar.

Það helsta úr leiknum má sjá hér að neðan. Dauðafærið hjá Kristni kemur eftir eina mínútu og 30 sekúndur.