HR byggir 350 íbúðir fyrir stúdenta og starfsmenn

Háskólinn í Reykjavík áformar að byggja 350 nýjar íbúðir og einstaklingsherbergi, auk leikskóla og þjónustuhúsnæðis, í nýjum Háskólagörðum vestan Öskjuhlíðar.

Borgarráð samþykkti í síðustu viku að auglýsa nýtt deiliskipulag fyrir svæðið. Unnið er að hönnun og fjármögnun bygginga á svæðinu og vonast er til að framkvæmdir geti hafist á næsta ári.

Fyrirhugaðar íbúðir eru ætlaðar til leigu og tímabundinnar búsetu fyrir nemendur og starfsfólk fyrirtækja sem starfa hjá HR og öðrum þekkingarfyrirtækjum í nágrenninu. Miðað er við litlar íbúðir og einstaklingsherbergi með sameiginlegri aðstöðu.

Ari Kristinn Jónsson, rektor HR, segist afar ánægður með að þessum áfanga hafi verið náð. Ekki sé tímabært að segja til um á þessari stundu hvernig verkefnið verður fjármagnað eða hvernig eignarhaldinu verður háttað. Fyrsta skref í áttina að svona verkefni sé að afgreiða deiliskipulagið og það sé núna frá. „Þetta er hugmyndin og hugmyndafræðin sem við viljum fara af stað með varðandi háskólagarðana okkar og nú getum við farið að vinna að öðrum hlutum á fullu, eins og fjármögnun og hönnun.“

Samkvæmt skipulagi verða byggingarnar almennt tvær til fjórar hæðir. Á jarðhæð er gert ráð fyrir möguleika á dagvöruverslun og annarri þjónustu. Syðst á svæðinu, næst Háskólanum í Reykjavík, er gert ráð fyrir leikskóla og annarri hverfisþjónustu.