Vilja vita hvernig viðbragðsáætlunum er fylgt

Fræðsluráð Hafnarfjarðar hefur óskað eftir kynningu á umfangi eineltismála í skólum Hafnarfjarðarbæjar og hvernig viðbragðsáætlunum skóla er fylgt. Þetta kom fram á fundi fræðsluráðsins í gær en þar var óskað eftir því að tekið yrði saman hve mörg slík mál kæmu inn á borð fræðslusviðs árlega að jafnaði og hvernig eftirfylgni og úrlausnir Skólaskrifstofunnar séu í þeim málum.

Ráðið óskaði eftir þessum upplýsingum vegna fjölmiðlaumræðu síðustu daga en í kvöldfréttum Stöðvar 2 á fimmtudag var sögð saga Birkis Emils Thor-Björnssonar. Birkir sem er 14 ára er með Goldenhar-heilkennið sem er sjaldgæfur fæðingargalli. Birkir er í Setbergsskóla í Hafnarfirði og sagði frá því að hann hefði alla skólagönguna þurft að þola gróft einelti.

Í greinargerð fræðsluráðsins segir að það sé „mikilvægt að fræðsluráð fái upplýsingar og greinargerð um umfang og fjölda slíkra tilvika. Mikilvægt er að viðbrögð eftirfylgni eineltismála séu í föstum skorðum enda er líðan og lífsgæði barna í húfi,“ segir í greinargerðinni.