Loka skíðabrekkum af ótta við málsóknir

Embættismenn víða um Bandaríkin hafa tekið þá ákvörðun að banna frekar börnum að renna sér á sleðum á opinberjum lóðum, en að eiga möguleika á málaferlum vegna slysa. Í borginni Dubuque í Iowa er einungis leyfilegt að renna sér í tveimur görðum borgarinnar af 50.

Samkvæmt AP fréttaveitunni eru ekki til opinberar tölur um fjölda borga sem hafa lokað vinsælum sleðabrekkum, en þó segir á vef AP að þeim fari sífellt fjölgandi.

Rannsókn sem framkvæmd var af Columbus barnaspítalanum segir til um að á árunum 1997 til 2007 hafi meira en tuttugu þúsund börn verið flutt á bráðamóttöku árlega vegna sleðaslysa.

Borgarráð Dubuque fjallaði um málið áður en bannið var sett á. Í umfjöllun ráðsins kom í ljós að á síðasta áratugi hafi fjölda mála verið höfðað gegn hinu opinbera. Borgin Omaha í Nebraska þurfti að borga tvo milljarða dala þegar fimm ára stelpa lamaðist við að renna á tré. Þá þurfti Sioux City að borga 2,75 milljónir dala eftir að maður skaddaði mænu sína við að renna á skilti.

Mismunandi leiðir eru þó farnar í borgum Bandaríkjanna. Sumstaðar hefur allsherjar sleðabann verið sett á. Þá hafa sumstaðar verið sett upp skilti sem vara við hættu og segja að fólk leiki sér á sleðum á eigin ábyrgð. Í borginni Paxton í Illinois, var heil sleðabrekka fjarlægð árið 2013.

Í Omaha var fólki bannað að renna sér niður vinsæla brekku eftir að borgin tapaði skaðabótamáli vegna slyss þar. Íbúar borgarinnar hlýddu banninu þó ekki svo það var afnumið. Þess í stað setti borgin dempara á staura og heybala í kringum tré.

Lögmaður borgarinnar segir AP að samkvæmt dómstólum í Nebraska sé það á ábyrgð hins opinbera að vernda íbúa, þrátt fyrir að þau taki slæmar ákvarðanir.