Sunny Sweetness dæmd fyrir brot á nálgunarbanni og hótanir

Sunna Guðrún Eaton hefur verið dæmd í fjögurra mánaða skilorðsbundið fangelsi fyrir brot á nálgunarbanni, brot gegn valdstjórn og ærumeiðandi aðdróttanir gegn opinberum starfsmanni. Ákæruliðir á hendur Sunnu voru fjórir og var hún fundin sek af þeim öllum. Dómur var kveðinn upp í Héraðsdómi Reykjavíkur síðastliðinn miðvikudag.

Grófar hótanir í garð starfsmanns Barnaverndar

Sunnu var meðal annars gefið að sök að hafa hótað Halldóru Dröfn Gunnarsdóttur, framkvæmdastjórar Barnaverndar Reykjavikur, ofbeldi og lífláti frá árinu 2011 allt til ársins 2013 eða þar til eiginmaður Halldóru lagði fram kæru. Sunna er sögð hafa margsinnis hringt í Halldóru og sent henni tvö smáskilaboð með innihéldu orðin „barnaræningi“ og „skítamella“.

Í vitnaleiðslum voru borin undir Sunnu ummæli sem höfð voru eftir henni í lögregluskýrslu frá árinu 2013 „í þá veru að hún hefði verið „búin að fantasera um það í nokkur ár að slíta af henni andlitið, hoppa ofan á andliti hennar, horfa á hana rúlla niður stiga, klippa af henni snípinn og láta manninn hennar éta hann“.“ Sunna neitaði að hafa viðhaft þessi ummæli, sem þó eru til á hljóðupptöku lögreglu.

Sjá einnig: Elti starfsmann Barnaverndar um Hagkaup með börnin í eftirdragi

Hinn 17. október síðastliðinn var Sunna Guðrún handtekin fyrir að hafa brotið gegn nálgunarbanni gagnvart lögreglumanni, þar sem hann sat að snæðingi í Múlakaffi, þar sem lögreglumenn alla jafna snæða sinn hádegisverð. Umræddur lögregluþjónn hefur þrívegis fengið nálgunarbann gegn Sunnu.

Sat um lögreglumanninn

Í dómnum er haft eftir lögreglumanninum að ónæði af hálfu Sunnu hefði lýst sér í ítrekuðum símhringingum á heimili hans auk þess sem hún hefði setið um heimilið og í eitt skipti hefði sést til hennar á svölum hússins sem hann býr.

Sjá einnig: Ljósmyndir til af Sunnu á svölum við heimili lögreglumannsins

Sunna Guðrún var 24. febrúar í fyrra dæmd til þrjátíu daga fangelsisrefsingar, skilorðsbundið í tvö ár, fyrir að hafa haft í hótunum um ofbeldi við áðurnefndan lögreglumann. Hún rauf því skilorð með dómi þessum. Skilorðsdómurinn frá því í fyrra var því tekinn upp og Sunnu dæmd refsins í einu lagi. Dómurinn taldi þó brot Sunnu gegn nálgunarbanninu ekki hafa falið í sér verulega röskun á friðhelgi lögreglumannsins.

Sunna hefur vakið athygli að undanförnu fyrir myndbönd sem hún setur inn á myndbandavefinn YouTube, þar sem hún kallar sig „Sunny Sweetness.“ Myndbandið „Feminists in Iceland,“ þar sem Sunna fer ófögrum orðum um íslenska femínista á ensku, rataði víða á samskiptamiðlum um síðustu áramót en hún hefur líka sent frá sér myndband þar sem hún gagnrýnir Barnavernd Reykjavíkur harðlega.