Arnór lagði upp tvö mörk en Norrköping tapaði samt

Arnóri Ingva Traustasyni og félögum í Norrköping mistókst í kvöld að ná þriggja stiga forskoti á toppi sænsku úrvalsdeildarinnar í fótbolta og Hjálmar Jónsson fékk dæmt á sig afdrifaríkt víti á lokamínútunum. Engu Íslendingaliði tókst að fagna sigri í leikjum kvöldsins.

Arnór Ingvi Traustason lagði upp mörk Norrköping í 3-2 tapi á móti IF Elfsborg en Alhaji Kamara skoraði bæði mörk toppliðsins.

Norrköping er nú með jafnmörg stig og AIk en betri markatölu. IFK Gautaborg er síðan aðeins einu stigi á eftir.

Alhaji Kamarak skoraði bæði mörkin sín með skalla eftir fyrirgjafir frá Arnóri, hann kom  Norrköping í 1-0 á 12. mínútu og minnkaði síðan muninn í 3-2 þrettán mínútum fyrir leikslok.

IF Elfsborg skoraði öll þrjú mörk sín á rúmum tuttugu mínútna kafla í fyrri hálfleiknum.

Hjálmar Jónsson og félagar í IFK Gautaborg hefðu getað nýtt sér tap Norrköping og komist í toppsætið en náðu aðeins 2-2 jafntefli á móti Djurgården.

Hjálmar Jónsson lék allan leikinn í vörn IFK Gautaborg sem hefur fengið langfæst mörk á sig í deildinni.

Þeir fengu hinsvegar á sig tvö mörk í kvöld en bæði liðin komust yfir í leiknum. Djurgården skoraði jöfnunarmarkið sex mínútum fyrir leikslok úr vítaspyrnu sem var dæmd á Hjálmar.

Rúnar Már Sigurjónsson spilaði allan leikinn þegar GIF Sundsvall tapaði 3-1 á útivelli á móti BK Häcken. Jón Guðni Fjóluson kom inná sem varamaður í hálfleik en þá var staðan 1-1.

Eiður Aron Sigurbjörnsson og Hjörtur Logi Valgarðsson spiluðu með Örebro í 2-2 jafntefli á móti Gefle.