Columbus Crew lagði Chicago Fire

Kristinn Steindórsson og félagar hans í Columbus Crew unnu öruggan 3-1 heimasigur á Chicago Fire í bandarísku MLS deildinni í kvöld. Kristinn hóf leikinn á bekknum en kom inn á sem varamaður á 81. mínútu.

Federico Higuaín kom Columbus yfir strax á annarri mínútu með marki úr vítaspyrnu en David Accam jafnaði metin sjö mínútum síðar. Eftir rúmt korter var Columbus komið í 2-1 en þá skoraði Kei Kamara.

Staðan batnaði ekki fyrir gestina í síðari hálfleik því á fimmtugustu mínútu fékk Jason Johnson sitt annað gula spjald fyrir að dýfa sér. Það var svo Ethan Finley sem rak síðasta naglann í kistu Chicago með marki á 83. mínútu.

Líkt og áður segir kom Kristinn inn á á 81. mínútu en hann náði ekki að setja mark sitt á leikinn að öðru leiti en að brjóta af sér einu sinni.

Eftir leikinn er Columbus Crew í fjórða sæti austurdeildarinnar með 27 stig, jafn mörg og Toronto og New England. Sex stig eru í DC United á toppnum. Chicago er hins vegar á botninum með átján stig.