Skrúðganga í miðbænum: „Borgið okkur mannsæmandi laun og hættið að nauðga okkur“

„Það er skelfilega sorglegt að á 100 ára afmæli kosningaréttarins skuli ekkert vera í hátíðardagskrá sem tekur mið af þeirri sterku feminísku undiröldu sem hefur rutt sér til rúms undanfarna mánuði,“ segir María Lilja Þrastardóttir en hún er ein af þeim sem ætlar sér að mæta í skrúðgöngu frá Miðbæjarskóla klukkan 15:45.

Stofnað hefur verið til viðburðar á Facebook undir nafinu Engin helvítis blóm: borgið okkur mannsæmandi laun og hættið að nauðga okkur hefur boðað til skrúðgöngu frá Miðbæjarskóla og svo í mótmælastöðu á Austurvelli kl: 16:00 í dag.

„Í stað þess að mæta kröfum kvenna og yfir hundrað ára baráttu okkar fyrir jafnrétti á að heiðra okkur með blómsveigum, ræðu frá karlmanni; Einari K. Guðfinnssyni, forseta Alþingis og forláta styttu af, með fullri virðingu, íhaldsamri forréttindakonu.“

Hún segir að ráðamenn hafi gefið kvennastéttum fingurinn með lögum sem takmarka frelsi þeirra til að mótmæla óréttlátum kjörum.

Appelsínugular og gular prófílmyndir hafa vakið mikla athygli á Facebook undanfarna daga. Appelsínugul andlit fyrir þau okkar sem hafa orðið fyrir kynferðisofbeldi, gul andlit fyrir þá sem vita af einhverjum sem hefur orðið fyrir slíku eða vilja sýna brotaþolum samstöðu.

Þegar þessi frétt er skrifuð hafa um 400 manns boðað komu sína.

Á Facebook síðu viðburðarins segir:  „Konur stigu fram og greindu frá kynferðisofbeldi og notuðu #konurtala, #þöggun til að tjá sig, þær hafa krafist þess að fá að skilgreina líkama sinn sjálfar undir #freethenipple, þær skora drusluskömmun á hólm, þær hafa sagt samfélaginu frá misrétti sem þær verða fyrir undir #6dagsleikinn, fatlaðar konur hafa beint sjónum að margþættu misrétti sem þær verða fyrir og konur eru að krefjast bættra kjara. Krafturinn og samstaðan sem konur hafa sýnt undanfarnar vikur í að berjast fyrir jöfnum réttindum er ólýsanlegur.“