Myndband úr dróna: Gríðarleg eyðilegging í Donetsk

Hermenn úkraínska stjórnarhersins og aðskilnaðarsinnar í austurhluta Úkraínu eiga enn í hörðum átökum um stjórn á flugvellinum í borginni Donetsk. Nýtt myndband sem tekið er úr dróna sýnir vel þá gríðarlegu eyðileggingu sem hefur átt sér stað í borginni síðustu vikur og mánuði.

Í frétt BBC kemur fram að herforingjar aðskilnaðarsinnar segi þá hafa stöðvað áhlaup stjórnarhersins við hernaðarlega mikilvæga brú milli flugvallarins og borgarinnar. Putylivskiy-brúin eyðilagðist í átökunum.

Stjórnvöld í Úkraínu og Rússlandi saka hvort annað um að virða ekki skilmála umsamins vopnahlés. Einn talsmanna aðskilnaðarsinna í Donetsk segja átta hermenn aðskilnaðarsinna hafa látist og 33 hafa særst í átökum sunnudagsins.

Talsmaður Úkraínustjórnar segir um 8.500 rússneska hermenn aðstoða aðskilnaðarsinna. Rússnesk stjórnvöld hafna þessu hins vegar, en viðurkenna að rússneskir „sjálfboðaliðar“ aðstoði þá.

Að neðan má sjá myndband af vef breska blaðsins Guardian sem sýnir þá miklu eyðilegginu sem orðið hefur í Donetsk, bæði á flugvellinum sjálfum og nánasta umhverfi hans.