Íhaldsflokkurinn vinnur stórsigur

David Cameron mun áfram búa á Downing stræti tíu þar sem hann mun vinna sem forsætisráðherra Bretlands, eftir stórsigur Íhaldsflokksins. Flokknum er spáð hreinum meirihluta með 331 þingsæti af 650 af BBC. Cameron er nú á fundi með Elísabetu drottningu sem mun væntanlega veita honum umboð til að mynda nýja ríkisstjórn.

Fyrir kosningarnar var búist við því að nú tækju við langar og erfiðar stjórnarviðræður á milli flokka. David Cameron er fyrsti forsætisráðherra Íhaldsflokksins til að ná endurkjöri frá því að Margaret Thatcher stjórnaði flokknum.

Meðal kosningaloforða íhaldsmanna var þjóðaratkvæðagreiðsla um veru Bretlands í Evrópusambandinu. í sigurræðu sinni hét Cameron því að standa við það loforð og sagði að Íhaldsflokkurinn myndi halda efnahagsáætlun sinni í gangi.

„Markmið mín eru skýr. Að stjórna á grundvelli þess að stjórna fyrir alla þegna konungsríkisins,“ hefur BBC eftir Cameron. „Ég vil sameina þjóð okkar, okkar konungsríki.“ Hann sagði ennfremur að hann stefndi að því að mynda ríkisstjórn á næstu dögum. Hann hyggst gefa Wales og Skotlandi aukið sjálfstæði og þannig draga úr stuðningi við aðskilnað þeirra frá Englandi.

@Number10gov Prime Minister David Cameron had an audience with The Queen this afternoon pic.twitter.com/q1rXjWfs4B

— BritishMonarchy (@BritishMonarchy) May 8, 2015