Leggja til sextán milljarða aukaútgjöld og sautján milljarða tekjur á móti

Stjórnarandstaðan leggur til að útgjöld ríkissjóðs verði hækkuð um 16 milljarða króna en að 17 milljarðar verði sóttir, meðal annars í gegnum orkuskatt. Þetta kemur fram í sameiginlegri yfirlýsingu Samfylkingar, Vinstri grænna, Bjartrar framtíðar og Pírata.

„Tillögurnar sýna að mögulegt er að leggja aðrar áherslur við stjórn landsins og nýta bætta afkomu ríkissjóðs á sanngjarnari hátt,“ segir í yfirlýsingu flokkanna. Tillögurnar gera meðal annars ráð fyrir að elli- og örorkulífeyrir hækki afturvirkt og að Landspítalinn fái aukið fjármagn.

Flokkarnir vilja hækka þak fæðingarorlofsgreiðslna upp í hálfa milljón og láta barnabætur hækka með hækkun á skerðingarviðmiðum. Þá er gert ráð fyrir hækkunum til háskóla og afléttingu fjöldatakmarkana í framhaldsskólum.

„Allar þessar tillögur eru fjármagnaðar með auknum tekjum, hærri veiðigjöldum, arði af bönkum, orkuskatti á stóriðju og bættu skatteftirliti,“ segir í tilkynningu flokkanna. „Þar fyrir utan má minna á að á yfirstandandi kjörtímabili hefur stjórnarmeirihlutinn tekið fjölmargar ákvarðanir um lækkun tekna sem nemur tugum milljarða.“ 

„Þar má nefna lækkun veiðigjalds, afnám auðlegðarskatts, lækkun á tekjuskatti betur stæðra, afnám sykurskatts, auk þess að heykjast á alvöru gjaldtöku af ferðamönnum,“ segja flokkarnir og bæta við að tillögurnar geti skapað gríðarlegt viðbótarsvigrúm í ríkisrekstrinum.

Útgjöld

• Landspítali viðhald 1.400
• Landspítali magnaukning 1.040
• Landspítali kjarasamningar 400
• Sjúkrahúsið á Akureyri 100
• Geðfatlaðir þjónusta, húsnæði 33
• Háskólar almennt 400
• Framhaldsskólar almennt 400
• Hækkun örorku og ellilífeyris 5.305
• Samgöngur nýframkvæmdir 700
• Viðhald vega 700
• Sóknaráætlun landshluta 400
• Fæðingarorlof hækkun 1.700
• Barnabætur 2.400
• Umboðsmaður Alþingis 15
• Fangelsismálastofnun 80
• Kynbundið ofbeldi 200
• Útlendingamál 200
• Stafræn íslenska 170
• Loftslagssjóður 200
• Græna hagkerfið 70
• Menningarmál 40
• Ríkisskattstjóri 58

Tekjur

• Orkuskattur 2.000
• Skatteftirlit 4.000
• Arður af bönkum 8.000
• Veiðigjöld 3.000