FIFA-maður framseldur til Bandaríkjanna

Fyrrum yfirmaður brasilíska fótboltans, Jose Maria Marin, hefur verið framseldur til Bandaríkjanna þar sem hann verður sóttur til saka vegna spillingarmála.

Marin hefur þegar lýst yfir sakleysi sínu en hann er einn af sjö yfirmönnum FIFA sem voru handteknir í stórri aðgerð gegn FIFA í maí síðastliðnum.

Marin er sakaður um að hafa þegið mútur upp á hundruðir milljóna í tengslum við Copa America og önnur mót í Suður-Ameríku.

Ef Marin verður fundinn sekur gæti beðið hans 20 ára vist í steininum.

Alls hafa Bandaríkjamenn ákært fjórtán núverandi og fyrrverandi yfirmenn FIFA vegna spillingarmála.