Framhald Eiðs í Kína óákveðið

Eiður Smári Guðjohnsen segir að enn sé óvíst hvað taki við hjá sér en tímabilinu í Kína er nú nýlokið.

Eiður Smári gekk í raðir Shijazhuang Ever Bright í sumar og var orðinn fastamaður í byrjunarliðinu undir lok tímabilsins. Hann segir við Morgunblaðið í dag að framhaldið sé óráðið en að hann haldi öllum möguleikum opnum.

„Ég þarf líka að taka minn tíma í að hugsa hvað sé réttast í stöðunni,“ sagði Eiður Smári. „Ég reikna með því að við munum ræða saman einhvern næstu daga.“

Hann segir að sér hafi líkað vel við kínversku deildina og að honum hafi liðið betur eftir að hann varð fastamaður í liðinu, sem gekk betur en vonir stóðu til.

„Þetta var fyrsta ár þess í efstu deild og niðurstaðan varð sjöunda sæti sem verður bara að teljast ágætt. Það er mörgu ábótavant [í kínversku deildinni] og á vissum sviðum eru Kínverjarnir svolítið eftir á en það er alveg möguleiki á að kínverskur fótbolti rífi sig í gang.“

Eiður segir að hann gefi sem fyrr kost á sér í íslenska landsliðið en á föstudag verður hópurinn fyrir vináttuleikina gegn Póllandi og Slóvakíu síðar í mánuðinum tilkynntur.