Formaður þýska knattspyrnusambandsins sagði af sér

Wolfgang Niersbach tilkynnt síðdegis að hann hefði sagt af sér sem formaður þýska knattspyrnusambandsins. Það hafi hann gert til að „vernda sambandið og skrifstofu þess“.

Fyrir helgi réðst lögreglan í Þýskalandi inn á skrifstofur þýska knattspyrnsambandsins sem og heimili þeirra Niersbach og Theo Zwanziger, formanns skipulagsnefndar HM 2006, og leitaði þar að sönnunargögnum um skattsvik.

Sjá einnig: Rassía gerð í höfuðstöðvum þýska knattspyrnusambandsins

Í síðasta mánuði birti þýska blaðið Der Spiegel frétt þess efnis að sérstökum sjóði hafi verið komið upp í aðdraganda kosningarinnar um HM 2006 til að kaupa atkvæði fyrir Þýskaland, sem fékk svo keppnina. Því neitaði Niersbach á sínum tíma og segir ekkert óeðlilegt við greiðslur þýska sambandsins til FIFA í tengslum við keppnina.

Der Spiegel fullyrti að þýska knattspyrnusambandið greiddi FIFA 6,7 milljónir evra á laun árið 2005 en skattayfirvöld í Þýskalandi hafa engar upplýsingar fundið um greiðsluna í gögnum sambandsins.

Þýska sambandið hélt neyðarfund í dag út af málinu og var niðurstaðan sú að Niersbach mun stíga til hliðar. Hann neitaði þó staðfastlega sök.

„Það sem er sársaukafullt er að það er nú gengið á mig út af níu ára gömlu máli sem ég átti engan þátt í og skilur eftir margar opnar spurningar fyrir mig. Ég ítreka að ég stóð í bakgrunninum og hafði enga vitneskju um peninngaflæðið,“ sagði í yfirlýsingu Niersbach.