Sigmundur sagði Árna Pál hafa engan áhuga á að spyrja um verðtrygginguna

Sigmundur Davíð Gunnlaugsson forsætisráðherra furðaði sig á því í óundirbúnum fyrirspurnum hvers vegna Árni Páll Árnason, þingmaður Samfylkingarinnar, nýtti ekki tækifærið til að spyrja hann um afnám verðtryggingarinnar undir liðnum óundirbúnum fyrirspurnum á Alþingi í dag.

Fyrr um morguninn hafði átt sér stað rúmlega klukkustundarlöng umræða þar sem rædd var dagskrárbreytingartillaga stjórnarandstöðunnar sem vildi fá sérstaka umræðu við Sigmund Davíð um stöðuna á vinnu við afnám verðtryggingarinnar. Stjórnarliðar felldu tillöguna.  Sigríður Ingibjörg Ingadóttir, þingmaður Samfylkingarinnar, lagði fram beiðni um slíka umræðu í febrúar síðastliðnum, aftur í haust og ítrekaði hana í gær.

Sigmundur Davíð hefur ekki orðið við þeirri beiðni því málið sé á borði efnahags- og fjármálaráðherra, Bjarna Benediktssonar. Sigmundur sagði í Bítinu á Bylgjunni í morgun að hann væri tilbúinn hvenær sem er að ræða verðtrygginguna við hvern sem er.

Forsætisráðherra lýsti sérkennilegri stöðu

Um leið og niðurstaða atkvæðagreiðslunnar hafði verið tilkynnt tóku við óundirbúnar fyrirspurnir á Alþingi. Árni Páll var fyrstu á mælendalista þar sem hann spurði Sigmund Davíð hvort forsendur samkomulags ríkisstjórnarinnar við erlenda kröfuhafa verði kynntar opinberlega áður en ríkisstjórnin hleypir kröfuhöfum úr landi.

Sigmundur Davíð sagði það vera sérkennilega stöðu að stjórnarandstaðan hefði haldið þinginu í gíslingu á annan klukkutíma þar sem hún heimtaði svör við spurningum um verðtrygginguna.

„Og á meðan var ekki hægt að svara spurningum þingmanna. Nú þegar Árni Páll Árnason fær tækifæri til að spyrja spurninga þá hefur hann engan áhuga á að spyrja um verðtryggingu. Hann spyr í staðinn um mál sem hann hefur spurt um áður og hefur fengið svör við áður, mál sem hann hafði misst af þegar svarað var sömu spurningu frá öðrum þingmönnum, meðal annars varaformanni Samfylkingarinnar.“

Sagði Árna Pál þykjast koma af fjöllum

Sigmundur sagði Árna Pál virðast alltaf vera að koma af fjöllum þegar umræðan snýst um losun hafta og uppgjör föllnu bankanna.

„Það stendur ekki til að veita afslátt af stöðugleikaskattinum. Það kom fram þegar áform stjórnvalda um stöðugleika hafta voru kynnt, þar væru tvær leiðar færar, báðar leiðir væru til þess hannaðar að ná sama markmiði, báðar leiðir væru til þess hannaðar að leysa jafn stóran efnahagslegan vanda. Það myndi gerast með ólíkum hætti en einn af kostunum við stöðugleikaskilyrða leiðina er sú að hún lagaði sig að umfangi vandans sama hversu stór hann reyndist, jafnvel þó hann reyndist stærri heldur en næmi skattinum, myndi sú leið laga sig að umfangi vandans,“ sagði Sigmundur.

Hann sagði það liggja ljóst fyrir að Seðlabankinn og fjármálaráðherra munu ekki fallast á stöðugleikaskilyrðin, þar með talið stöðugleikaframlagið, nema þau uppfylli það sem þeim var ætlað.  „Þetta hefur legið fyrir frá því málið var fyrst kynnt og það er fráleitt hjá þingmanni að koma hérna hvað eftir annað og þykjast algerlega koma af fjöllum með þetta allt saman.“

Sagði eftirtektarvert að Sigmundur svaraði ekki spurningunni

Árni Páll sagði það eftirtektarvert að Sigmundur hefði ekki svarað spurningu hans, hvort forsendur verði gerðar opinberar og hvort þingið fái tækifæri til að rýna þær áður en ríkisstjórnin ákveður að hleypa erlendum kröfuhöfum úr landi. Hann sagði það vera fullnaðaraðgerð því þá væru kröfuhafarnir „sloppnir úr landi“ og ekki hægt að gera kröfur á þá. Árni Páll sagði sporin hræða því forsendurnar væru óljósar.

Kröfuhafar „dauðfegnir“ að losna við bankann

Sagði hann það hafa verið undarlegar fréttir að kröfuhafar Glitnis hafi ákveðið að afhenda ríkinu Íslandsbanka aftur, því þeir hefðu ekki geta selt hann í útlöndum.

„Þannig að þeir eru dauðfegnir að losna við hann. Og íslenska ríkið getur ekki sent hann til erlendra kaupenda miðað við þetta og þá þarf að selja hann innanlands og er það kannski ástæðan fyrir gleði ríkisstjórnarinnar með þá tillögu að þeir eru með kaupendur nú þegar í huga. Því það er alls ekki ljóst að þessi greiðasemi við kröfuhafana að losa þá við þennan eignarhlut hafi verið í þjóðarþágu.“

Málflutningurinn í besta falli hlægilegur

Sigmundur Davíð sagði þennan málflutning Árna Páls í besta falli hlægilegan. „Hann skilur ekki helstu staðreyndir málsins, kröfuhafar hljóta að vera dauðfegnir að losna við eignina, banka sem er með eigið fé upp á 185 milljarða. Þingmaður heldur þessu fram hafandi verið í ríkisstjórn sem ekki aðeins afhenti þennan banka kröfuhöfunum og fleiri banka, heldur ætlaði auk þess að setja nokkur hundruð milljarða til viðbótar á skattgreiðendur til að hlaupa undir bagga með gjaldþrota bönkum,“ sagði Sigmundur.

Dómstólar skera úr um nauðasamninga

Hann sagði forsendurnar liggja fyrir og gert verð enn betur grein fyrir þeim þegar þar að kemur. Hann sagði Árna Pál einnig misskilja þegar hann haldi því fram að ríkisstjórnin hleypi kröfuhöfunum úr landi.  „Það er ekki ríkisstjórnin sem hleypir þessu í gegn, þetta fer fyrir dómstóla á endanum sem skera úr um það hvort fallist skuli á nauðasamninga.“