Hugur starfsfólks og íbúa hjá aðstandendum

Íbúar og starfsfólk búsetukjarna Reykjavíkurborgar við Miklubraut eru slegnir og hafa fengið áfallahjálp eftir að karlmaður á sextugsaldri fannst látinn í húsinu í gærkvöldi. Sá hafði orðið fyrir líkamsárás og er karlmaður á fertugsaldri í haldi lögreglu og var krafist gæsluvarðhalds yfir honum fyrir héraðsdómi í hádeginu í dag. 

Stefán Eiríksson, sviðsstjóri velferðarsviðs Reykjavíkurborgar, segir í samtali við Vísi að vel og fagmannlega hafi verið brugðist við af hálfu starfsmanna seint í gærkvöldi og í nótt. Hann hafi sjálfur mætt á vettvang í nótt og var þá þegar unnið að því að hafa samband við aðstandendur íbúa í kjarnanum og upplýsa þá um hvað gerst hafði.

Eitt flóknasta úrræði borgarinnar

Um er að ræða einn af sextíu til sjötíu búsetukjörnum fyrir fatlað fólk í Reykjavík. Þessi tiltekni kjarni er fyrir geðfatlaða einstaklinga sem eiga við fjölþættan vanda að stríða eins og til að mynda með neyslu vímuefna.

„Þetta er eitt af okkar flóknustu úrræðum sem þarna er,“ segir Stefán en margir íbúa hafi glímt við vanda sinn árum eða áratugum saman. Áður en úrræðinu var komið á fót höfðu sumir sem glímdu við þessi vandamál búið á götunni. Úrræðið var sett á laggirnar fyrir um áratug síðan að sögn Stefáns en peningar sem ríkissjóður fékk við sölu Símans árið 2005 hafi þar skipt sköpum.

Hugur starfsfólks og íbúa hjá aðstandendum

Stefán minnir á að lögreglurannsókn standi yfir sem muni leiða í ljós hvað varð til þess að manninum var ráðinn bani.

„Við fyrstu yfirferð er ekkert sem bendir til þess að það hafi eitthvað verið gert sem ekki átti að gera eða hafi verið í ósamræmi við það vinnulag sem þarna tíðkast,“ segir Stefán. Málið verði þó eðlilega skoðað gaumgæfilega og athugað hvort eitthvað megi lagfæra í verklaginu með hliðsjón af þessum atburði.

Að sögn Stefáns eru allir, hvort sem er starfsfólk eða íbúar, mjög slegnir yfir atburðum gærkvöldsins. Starfsfólk muni halda áfram að aðstoða íbúa í gegnum áfallið og sinna þeirra þörfum eins og áður.

„Við þurfum líka að huga að starfsmönnum sem þarna eru og þeirra líðan. Það eru allir mjög slegnir, eðlilega. Starfsmenn þekktu þá sem hlut eiga að máli og hugur þeirra og íbúa er hjá aðstandendum.“