Braskarar bættu Jafeti farsímann

Hinn níu ára gamli Jafet hefur tekið gleði sína á ný, eftir að hafa týnt farsíma sínum þegar ferðaþjónusta fatlaðra skildi hann í síðustu viku eftir á bílaplani við matvöruverslun í nágrenni við heimili hans, í stað þess að aka honum heim. Hann hefur leitað símans logandi ljósi síðan þá.

Bróðir Jafets, Aron Vignir, auglýsti eftir símanum á Facebook, en góðhjartaðir notendur hópsins Brask og brall ákváðu að taka málin í sínar hendur og safna fyrir nýjum farsíma.

„Við áttum alls ekki von á svona viðbrögðum og í raun langt frá því sem við ætluðum okkur. Aron Vignir setti þessa auglýsingu inn í þeirri von um að einhver hefði fundið símann, því síminn er í miklu uppáhaldi hjá Jafet. Þá var einn sem stakk upp á því að hver og einn myndi leggja inn þúsund krónur fyrir nýjum síma og þannig gekk þetta koll af kolli,“ segir Anna Lovísa Jónsdóttir, móðir Arons Vignis og Jafets.

Alls söfnuðust 16.500 krónur og fóru þau mæðgin í gær og keyptu nýjan síma. „Við fórum í gær og keyptum alveg eins, nema hvítan. Hinn var svartur. Jafet er alveg í skýjunum en hann var alla helgina verulega sár. Núna hins vegar er hann bara búinn að vera í því að hringja í ættingjana,“ segir Anna.

„Þetta er bara svo gaman. Það eru allir svo góðhjartaðir og vildu allt fyrir hann gera. Ég er búin að þakka öllum fyrir að bregðast svona við.“

Sjá einnig: Strætó: Hann er sem betur fer ekki meira einhverfur en það að hann rataði heim

Sagt var frá máli drengsins í fréttum Stöðvar 2 í kvöld. Jafet er einhverfur og getur ekki gengið í venjulegan grunnskóla, heldur er hann í Vogaskóla í sérstakri einhverfudeild. Til að komast í og úr skóla frá heimili sínu í Árbæ nýtir hann sér ferðaþjónustu fatlaðra. 

Skýrt er tekið fram í gögnum Strætó að aka eigi drengnum til og frá heimili hans, en var í síðustu viku skilinn eftir á bílaplani við Krónuna í Árbæ. Anna Lovísa segir atvikið hafa tekið nokkuð á son sinn, en viðtalið við hana, sem og framkvæmdastjóra Strætó, má sjá í spilaranum hér fyrir neðan.