Andstæðingar ESB-aðildar Bretlands sameinast í „Out“

Andstæðingar Evrópusambandsaðildar í Bretlandi hafa sameinast og stofnað regnhlífasamtökin „Out“. Samtökin munu berjast fyrir því að Bretar greiði atkvæði gegn veru landsins í sambandinu í þjóðaratkvæðagreiðslunni sem fyrirhuguð er árið 2017.

David Cameron forsætisráðherra hefur heitið því að semja um breytt aðild Bretlands að ESB fyrir atkvæðagreiðsluna. Cameron vill sjálfur áfram sjá Bretland sem aðila að sambandinu. Hann segist þó ekki útiloka neitt, sjái hann ekki fram á þær breytingar á sambandi Bretlands og ESB sem hann vill.

Í frétt Reuters kemur fram að Arron Banks, einn af fjárhagslegum bakhjörlum UKIP, standi að stofnun regnhlífasamtakanna Out og segir Banks að samtökin hafi nú þegar 150 þúsund stuðningsmenn.

Samtökin voru formlega stofnuð á landsfundi UKIP sem nú fer fram í Doncaster í norðurhluta Englands.

„Við munum sjá ólíka og ósamstæða hópa í landinu koma saman en þeir styðja úrsögn úr ESB,“ segir Nigel Farage, formaður UKIP.

Skoðanakannanir benda flestar til þess að meirihluti Breta vilji áfram vera aðili að ESB, þó að nokkur hefur dregið saman með fylkingum síðustu mánuði.