Forseti Írans vill rannsókn á atburðunum í Mekka

Hassan Rúhaní, forseti Írans, hefur kallað eftir rannsókn á hörmungunum sem áttu sér stað í sádí-arabísku borginni Mekka á fimmtudag. Þar létu hátt í átta hundruð pílagrímar lífið í troðningi við Jamarat-súlurnar þekktu.

Íran er eitt fjölmargra ríkja sem gagnrýnt hafa yfirvöld í Sádi-Arabíu fyrir óviðunandi öryggisgæslu á svæðinu en rúmlega 130 Íranar létu lífið í troðningnum.

Sádi-arabísk stjórnvöld halda því hins vegar fram að pílagrímarnir hafi ekki fylgt fyrirmælum og að ekki hefði verið hægt að koma í veg fyrir ósköpin. Salmann konungur hefur þó einnig farið fram á að öryggisgæslan verði rannsökuð.

Annað stórslys átti sér stað í Mekka fyrir tveimur vikum, en þá féll byggingarkrani á mannfjöldann við Stóru moskuna með þeim afleiðingum að 109 létu lífið.