Innlent

Bætur vegna gæsluvarðhalds lækkaðar um tæpa milljón af Hæstarétti

Sunna Kristín Hilmarsdóttir skrifar
Af vettvangi skotárásarinnar í nóvember 2011.
Af vettvangi skotárásarinnar í nóvember 2011. vísir/egill
Hæstiréttur hefur dæmt íslenska ríkið til að greiða karlmanni 500.000 krónur í skaðabætur þar sem hann sat í gæsluvarðhaldi að ósekju á tímabilinu 5. mars 2012 til 22. mars 2012. Áður hafði Héraðsdómur Reykjavíkur dæmt manninum 1,4 milljónir í bætur vegna gæsluvarðhaldsins.

Maðurinn sat í haldi grunaður um að aðild að skotárás í Bryggjuhverfi í nóvember 2011. Hann var handtekinn 7. desember sama ár og sat í gæsluvarðhaldi til 22. mars 2012 en þá sýknaði héraðsdómur manninn af skotárásinni.

Hann fór því fram á bætur vegna alls þess tíma sem hann sat í gæsluvarðhaldi en á það var ekki fallist hvorki í héraðsdómi né Hæstarétti þar sem maðurinn hafði ekki greint satt og rétt frá í yfirheyrslum og þar til hann gaf skýrslu fyrir dómi.

Dóm Hæstaréttar má sjá hér.


Tengdar fréttir

Höfuðpaur í skotárásarmáli í fjögurra ára fangelsi

Kristján Halldór Jensson, höfuðpaurinn í skotárásarmálinu í Bryggjuhverfi, var dæmdur í fjögurra ára fangelsi í Héraðsdómi Reykjavikur í dag. Tómas Pálsson Eyþórsson var dæmdur í átján mánaða fangelsi fyrir aðild sína að málinu og Axel Smith var dæmdur til að greiða tæpar 70 þúsund krónur í sekt. Tómas var sá eini af sakborningunum sem var mættur við dómsuppkvaðningu. Mennirnir eru dæmdir fyrir hættubrot en ekki tilraun til manndráps.

Ósannað að byssumennirnir hafi reynt að drepa fórnarlömbin

Axel Már Smith, sem var ákærður fyrir aðild að skotárás í Bryggjuhverfinu í nóvember síðastliðnum, var sýknaður af þeim ákærulið. Þetta kemur fram í dómnum sem Vísir hefur undir höndum. Þrír menn voru ákærðir í málinu. Auk Axels voru það þeir Kristján Halldór Jensson, sem var dæmdur í fjögurra ára fangelsi, og Tómas Pálsson Eyþórsson sem var dæmdur í eins og hálfs árs fangelsi. Skotið var á bíl við bílasöluna Höfðahöllin.

Áfram í gæsluvarðhaldi vegna skotárásar

Karlmaður á þrítugsaldri hefur á grundvelli rannsóknarhagsmuna verið úrskurðaður í áframhaldandi gæsluvarðhald til áttunda desember að kröfu lögreglunnar á höfuðborgarsvæðinu í tengslum við rannsókn hennar á skotárás í Bryggjuhverfi föstudaginn 18. nóvember síðastliðinn.

Mest lesið


Fleiri fréttir

Sjá meira


×

Mest lesið