Umræður um stefnuræðu forsætisráðherra bragðdaufasta efni sem Alþingi býður upp á

Umræður um stefnuræðu forsætisráðherra eru bragðdaufasta efni sem Alþingi hefur upp á að bjóða og rúmlega tveggja klukkustunda langt glatað sjónvarpsefni. Þetta er mat Össurar Skarphéðinsson, þingmanns Samfylkingarinnar, og Svanhildar Hólm Valsdóttur, aðstoðarmanns Bjarna Benediktssonar fjármálaráðherra.

Þau tjá sig um málið á Facebook en þar segir þessa umræðu hafa skipt máli fyrir áratugum þegar fjölmiðlun var á allt öðru stigi en í dag sé núverandi form algerlega úr taki við alla aðra þróun á umræðu og skoðanaskiptum um stjórnmál.

„Formið er gamaldags og úrelt, á sinn þátt í að klippa á tengsl Alþingis og raunveruleikans,“ skrifar Össur.

Svanhildur segir að tilgangurinn með umræðunum hljóti að vera að ná athygli áhorfenda og halda henni, gefa innsýn í störf þingsins og koma á framfæri einhverri sýn og stefnu. „Það fellur dálítið um sjálft sig ef þetta verður svo langt og leiðinlegt að hörðustu áhugamenn um pólitík gefast upp.“

Bæði leggja þau til að formi þessara umræða verði breytt. Þær styttar og gerðar hnitmiðaðri. Svanhildur vill fækka ræðumönnum og hafa einungis tvær umferðir. Ræðumenn í fyrri umferð fengju fimm mínútur hver og ræður í þeirri síðari mættu ekki vera lengri en tvær og hálf mínúta.

Sjá einnig: Hvað var Sigmundur Davíð að skoða í símanum?

Össur segir stefnuræðu forsætisráðherra eiga að vera um 15 mínútur en eftir hana fengi einn þingmaður frá hverjum flokki stjórnarandstöðunnar færi á 2x1 mínútu andsvörum við forsætisráðherrann. Í kjölfarið fengju fulltrúar allra flokka 6 -8 mínútur til að koma meginatriðum sínum á framfæri. Í lokin myndi fulltrúi ríkisstjórnarinnar – eftir atvikum forsætisráðherrann eða leiðtogi annars stjórnarflokks – loka umræðunni á fimm mínútum. Og heimastílar væru bannaðir.

Hann segir þetta for gefa ríkisstjórninni færi á að koma stefnu sinni tryggilega á framfæri og stjórnarandstöðunni færi til að setja fram beinskeytta gagnrýni. „Þetta gæti orðið ágætis sjónvarp. Mestu skiptir kannski að þetta myndi ekki drepa neinn úr leiðindum,“ segir Össur.

Óbærilegur léttleiki tilverunnar?Mér leiðist aldrei á Alþingi nema undir umræðum um stefnuræðu forsætisráðherra. Það...

Posted by Össur Skarphéðinsson on Tuesday, September 8, 2015

Stutta útgáfan: Það þarf að stytta sjónvarpsumræður á Alþingi. Þetta er of langt og leiðinlegt til að fólk endist til að...

Posted by Svanhildur Hólm Valsdóttir on Tuesday, September 8, 2015