Göngufólk fann lík unga mannsins við Sauðdrápsgil í Laxárdal

Það var göngufólk sem gekk fram á lík ungs karlmanns við Sauðdrápsgil í Laxárdal í Nesjum á þriðjudag. Réttarkrufning fór fram á líki mannsins í gær en engin niðurstaða er komin úr henni. Fyrir höndum er leit í gagnasöfnum hér heima og erlendis til að reyna að bera saman hvort finnast einhver fingraför eða sýni sem hægt er að bera saman.

Sveinn Kristján Rúnarsson, yfirlögregluþjónn lögreglunnar á Suðurlandi, segir að ekki hafi enn verið borin kennsl á líkið af manninum. Hann segir kennslanefnd ríkislögreglustjóra nú vinna úr niðurstöðum krufningarinnar og því sem hún hefur fengið í hendurnar úr því. „Það er verið að fara yfir gagnasöfn hér heima og erlendis og reyna að bera saman hvort það finnast einhver fingraför eða sýni sem hægt er að bera saman,“ segir Sveinn.

Útiloka ekki neitt

Hann segir í raun ekkert vitað hvernig andlát mannsins bar að og því ekki hægt að útiloka neitt. „Þar til við vitum ekkert fast í hendi þá útilokum við ekki neitt. Hvort þetta geta verið veikindi eða sjálfsvíg eða borið að með einhverjum voveiflegum hætti.“

Ekki í alfaraleið

Líkt og fyrr segir fannst líkið við Sauðdrápsgil sem er fyrir miðju Laxárdals við hlið Fálkagils. Ekki er um alfaraleið að ræða en gönguslóði í Laxárdal liggur rétt við Sauðdrápsgil.

Lögreglunni á Suðurlandi barst tilkynning um líkfundinn á lögreglustöðina á Höfn í Hornafirði klukkan 16:11 í fyrradag. Lögreglumenn á Höfn fóru þegar á vettvang. Landhelgisgæslan lagði til þyrlu til að flytja rannsóknarlögreglumann frá rannsóknardeild lögreglunnar á Suðurlandi, lögreglumenn úr kennslanefnd ríkislögreglustjóra, rannsóknarlögreglumann frá tæknideild lögreglunnar á höfuðborgarsvæðinu og réttarlækni á staðinn.

Ungur maður með axlasítt hár

Kennslanefnd hefur gefið út að líkið sé af ungum karlmanni, um það bil 186 sentimetrar á hæð, með ljóst axlasítt hár klætt í svarta strigaskó með hvítri stjörnu á hlið, dökkbláar íþróttabuxur og hettupeysu með áletrun að framan „QUICKSILVER“.

Lögreglan segir að ætla megi að maðurinn hafi látist fyrir einhverjum mánuðum síðan. Hún óskaði eftir ábendingum um málið ef einhverjar væru en Sveinn Kristján segir ekki margar hafa borist lögreglu. Er biðlað til allra þeirra sem gætu veitt upplýsingar að hringja inn í síma 842 4250.