Óheimilt að synja Harriet um vegabréf

Þjóðskrá var óheimilt að synja hinni ellefu ára gömlu Harriet Cardew um vegabréf, í júní árið 2014, á grundvelli þess að nafn hennar væri ekki samþykkt af mannanafnanefnd.

Innanríkisráðuneytið kvað upp úrskurð í málinu þann 12. ágúst, rúmu ári eftir að foreldrar Harrietar kærðu úrskurð Þjóðskrár. Stofnuninni hefur verið gert að skrá nafn Harrietar í þjóðskrá og gefa út vegabréf með nafninu Harriet Cardew.

Harriet hafði frá fæðingu borið nafnið Stúlka Cardew í þjóðskrá því nafnið þykir ekki í samræmi við mannanafnalög. Hið sama hefur gilt um eldri bróður hennar, Duncan sem borið hefur nafnið Drengur Cardew.

Faðir Harrietar er breskur ríkisborgari og móðir hennar er bæði með íslenskan og bandarískan ríkisborgararétt.

Úrskurður innanríkisráðuneytisins byggir á því að foreldrunum hafi verið heimilt að nefna hana erlendu nafni þar sem báðir foreldrarnir séu erlendir ríkisborgarar.

Kristín Cardew, móðir Harrietar og Duncans segist fegin því að niðurstaða sé komin í málið.

„Þetta er ofboðslega furðulegt mál, þetta eru sömu nöfnin og sömu börnin,“ segir hún en Harriet og Duncan höfðu áður fengið útgefin vegabréf með nöfnunum stúlka og drengur Cardew.

„Við vonum að þetta hafi áhrif og setji ákveðna endurskoðun í gang,“ segir Kristín.

Innanríkisráðuneytið vinnur nú að endurskoðun á mannanafnalögum.

Ólöf Nordal innanríkisráðherra hefur gefið út að hún sé fylgjandi að slakað verði á kröfum sem gerðar séu til nafngifta í lögunum.

„Það er náttúrulega líka fáránlegt, af því að það er alltaf verið að tala um að lögin verndi börn en þau banna fullorðnu fólki líka að velja sér nöfn,“ segir Kristín.