Forsetinn fyrrverandi beið lægri hlut

Líklegt þykir að fyrrverandi forseti Sri Lanka, Mahinda Rajapaksa, og flokkur hans, þurfi að viðurkenna ósigur sinn í þingkosningunum sem nú fara fram í landinu. Rajapaksa bauð sig fram til embættis forsætisráðherra eftir að hafa tapað óvænt í forsetakosningunum fyrir átta mánuðum síðan.

Endanleg niðurstaða liggur fyrir síðar í dag en nýjustu tölur benda til þess að flokkur sitjandi forsætisráðherra, Ranil Wickremesinghe, hafi unnið sigur í kosningunum. Rajapaksa kemur þó líklega til með að taka sæti á þingi.

Mikil ólga hefur ríkt í landinu í kosningabaráttunni og til átaka hefur komið þar sem að minnsta kosti fjórir hafa látist. Fengnir hafa verið tæplega áttatíu þúsund lögreglumenn og öryggisliðar til að standa vörð um kjörstaði.