Tyrkneskir hermenn féllu í sprengjuárás

Tveir tyrkneskir hermenn féllu og tveir til viðbótar særðust í sprengjuárás gegn bílalest hersins í suðausturhluta Tyrklands í morgun.

Árásin var gerð í Şirnak-héraði, nærri landamærunum að Sýrlandi og Írak.

Til átaka kom milli hermanna og uppreisnarmanna sem taldir eru tilheyra sveitum PKK sem um árabil hafa barist fyrir aukinni sjálfsstjórn Kúrda í suðausturhluta Tyrklands.

PKK hófu árásir gegn tyrkneskum öryggissveitum eftir sjálfsvígssprengjuárásina í Suruc fyrir tveimur vikum þar sem 32 fórust. Á þriðja tug hermanna og lögreglumanna hafa látið lífið í árásum PKK síðustu daga.

Tyrklandsher hefur einnig hafið loftárásir á stöðvar PKK.