Rivaldo feðgarnir skoruðu í sama leiknum

Brasilíumaðurinn Rivaldo er enn að spila þrátt fyrir að vera orðinn 43 ára gamall en hann var á skotskónum fyrir lið sitt, Mogi Mirim, í 3-1 sigri á Macae í brasilísku B-deildinni.

Sonur hans, hinn tvítugi Rivaldinho, leikur einnig með liðinu og skoraði tvö marka sinna manna í leiknum eftir að karl faðir hans hafði skorað annað mark Mogi Mirim úr vítaspyrnu.

Rivaldinho skoraði fyrsta mark leiksins með skalla en faðir hans hafði átt lykilsendingu í aðdraganda marksins.

„Gamli“ maðurinn sagði að hann væri bæði þakklátur og ánægður í leikslok en Mogi Mirim hefur unnið báða leiki sína eftir að Rivaldo tók fram skóna á ný til að hjálpa liði sínu í botnbaráttu B-deildarinnar í Brasilíu.

Rivaldo er forseti félagsins en hann varð heimsmeistari með landsliði Brasilíu árið 2002. Hann lék með Barcelona og AC Milan á löngum ferli.