Birkir orðinn leikmaður Basel

Landsliðsmaðurinn Birkir Bjarnason er genginn í raðir svissneska liðsins Basel frá Pescara á Ítalíu. Frá þessu var greint á heimasíðu Basel í morgun.

Birkir, sem er 27 ára, skrifaði undir þriggja ára samning við Basel sem hefur unnið svissnesku deildina sex síðustu ár.

Um tíma leit allt út fyrir að Birkir myndi fara til Torino á Ítalíu en svo kom Basel inn í myndina. Birkir var einnig orðaður við enska B-deildarliðið Leeds United.

Sjá einnig: Birkir fær aðvörun frá forseta Pescara

Birkir, sem hefur leikið 38 A-landsleiki, átti flott tímabil með Pescara sem var hársbreidd frá því að komast upp í ítölsku úrvalsdeildina í vor. Birkir skoraði 12 mörk í 39 deildarleikjum með Pescara í vetur.

Basel er sem áður sagði ríkjandi meistari í Sviss auk þess sem liðið hefur verið fastagestur í Meistaradeild Evrópu síðustu ár. Svissneska liðið komst upp úr riðli sínum í Meistaradeildinni í vetur en tapaði fyrir Porto í 16-liða úrslitunum, samanlagt 5-1.

Það verður nýr maður í brúnni hjá Basel á næsta tímabili en Svisslendingurinn Urs Fischer er tekinn við sem knattspyrnustjóri liðsins af Portúgalanum Paolo Sousa.