Telja lögin brot á stjórnarskrá og Mannréttindasáttmála Evrópu

„Við gáfum náttúrulega umsögn um lögin og fórum að skoða hvernig þetta sneri að okkur. Svo núna í dag héldum við stjórnarfund og samþykktum að fara þessa leið,“ segir Ólafur G. Skúlason, formaður Félags íslenskra hjúkrunarfræðinga.

Félagið hyggst fara í mál við ríkið vegna laga sem sett voru á verkfall hjúkrunarfræðinga. Telur félagið að lagasetningin brjóti gegn stjórnarskránni og Mannréttindasáttmála Evrópu.

Ólafur segir að ef að málið fái flýtimeðferð fyrir dómstólum megi áætla að það taki 4-7 mánuði að fara alla leið upp í Hæstarétt. Takist samningar ekki fyrir 1. júlí mun kjaradeilan fara í gerðardóm.

„Við lítum svo á að ef dómur fellur á þann veg að lögin standast ekki stjórnarskrá þá erum við ekki bundin af niðurstöðu gerðardóms,“ segir Ólafur. Hann segir málsóknina engin áhrif hafa á samningsvilja FÍH.

„Við erum alveg tilbúin til að setjast við samningsborðið hvenær sem er.“

Ekki hefur verið boðað til nýs samningafundar í deilunni.