Yfirheyrslum lokið í Ölgerðarmálinu: Auglýsingastofan opnar bókhaldið

Mennirnir tveir sem grunaðir eru um meint fjársvik í Ölgerðarmálinu svokallaða hafa verið yfirheyrðir af lögreglunni á höfuðborgarsvæðinu sem er með málið til rannsóknar. Greint var frá því í síðustu viku að Ölgerðin Egill Skallagrímsson hefði vikið einum af vörumerkjastjórum sínum úr starfi og hann kærður fyrir meint fjársvik í starfi. Málið varðaði að sögn Ölgerðarinnar tilhæfulausa reikninga sem gefnir voru út af auglýsingastofunni Vert og voru stílaðir á Ölgerðina.

Starfsmaður Verts var einnig kærður vegna málsins en eigendur stofunnar sendu í kjölfarið frá sér yfirlýsingu þar sem þeir sögðust vera miður sín vegna málsins. Sögðu eigendurnir að verklag með meðhöndlun reikning hafi verið ámælisvert en það hafi aldrei verið ætlunin að valda Ölgerðinni fjártjóni. Lýstu þeir því jafnframt yfir að bókhald Verts hafi verið opnað til þess að upplýsa málið.

Hafliði Þórðarson er yfirmaður auðgunarbrotadeildar lögreglunnar á höfuðborgarsvæðinu en hann segir mennina tvo, starfsmann Ölgerðarinnar og starfsmenn Verts, hafa verið yfirheyrða í síðustu viku. Hann gat ekki gefið upp hvort mennirnir tveir neituðu sök eða hefðu játað á sig brotin en hann sagði engan hafa verið hnepptan í varðhald vegna málsins.  Hann svaraði því neitandi þegar hann var spurður hvort fleiri væru grunaðir í málinu en þessir tveir sem hafa verið yfirheyrðir vegna málsins.

Vísir ræddi við Andra Þór Guðmundsson, forstjóra Ölgerðarinnar, í síðustu viku vegna málsins og sagði hann um umtalsverðar fjárhæðir að ræða. „Það þarf ekki að fara nánar út í það en ég held að það sé augljóst að þetta eru ekki hundrað þúsund kallar.“