Bátur sökk við Hellissand: Synti í sjónum án hlífðarfatnaðar í tíu mínútur

„Maðurinn var um tíu mínútur í sjónum,“ segir Arnar Laxdal, björgunarsveitarmaður, en bátur með einum innanborðs sökk rétt við Hellissand seinnipartinn í dag. Skipsverjinn komst ekki í galla, né björgunarvesti og björgunarbáturinn sprakk ekki út.

Hann var því í sjónum í um tíu mínútur eða þar til að Ólafur Bjarnason SH frá Ólafsvik kom honum til bjargar.

Rétt fyrir klukkan fimm í dag barst björgunarsveitinni Lífsbjörg tilkynning um vélarvana bát og að leki væri kominn í Herkúles SH NV af Rifi. Báturinn sökk rétt fyrir utan Hellissand eða um fjórum mílum norðaustur af Rifi.  

„Hann var ekki í galla eða neitt og var bara í sínum fötum. Hann komst ekki í neitt. Maðurinn hafði reynt að ná út björgunarbátnum og hafði togað í alla spotta, en báturinn virðist hafa verið gallaður. Fólki var mjög brugðið hér í bæjarfélaginu,“ segir Arnar sem var um borð í björgunarskipinu. Maðurinn komst um borð í Ólaf SH heill á húfi en mjög kaldur.