Beðið niðurstöðu krufningar

Ekki er talið að neitt saknæmt hafi átt sér stað sem leiddi til andláts mannsins sem fannst á heimili sínu í Laugarneshverfinu fyrir helgi. Maðurinn hafði verið látinn í um tvo mánuði þegar hann fannst. Lögreglan er með málið til rannsóknar.



Að sögn Kristjáns Inga Kristjánssonar aðstoðaryfirlögregluþjóns er beðið eftir niðurstöðum úr krufningu. Ekki liggur fyrir hver dánarorsökin sé en hann segir ekki benda til þess að um saknæmt athæfi hafi verið að ræða.



Maðurinn fannst eftir að nágrannar hans í fjölbýlishúsinu sem hann bjó í höfðu samband við systkini hans vegna lyktar sem var farin að berast frá íbúð hans. Þau fóru inn í íbúðina og komu að bróður sínum látnum og gerðu lögreglu viðvart.



Að sögn Kristjáns Inga koma upp nokkur svona dæmi á hverju ári, að fólk deyi án þess að nokkur verði þess var í nokkurn tíma. Lögreglan rannsaki öll slík mál, óháð því hvernig andlát viðkomandi bar að.