Læknafélag Íslands hvetur foreldra til að bólusetja börn sín

Stjórn Læknafélags Íslands hvetur foreldra og forráðamenn barna til að láta bólusetja börn sín samkvæmt þeim ráðleggingum sem í gildi eru hverju sinni. Þetta segir í ályktun sem stjórn félagsins samþykkti á fundi sínum í vikunni og sendi frá sér í dag.

„Með reglulegu millibili sprettur upp umræða í fjölmiðlum um bólusetningar barna og hugsanlega skaðsemi þeirra,“ segir í ályktuninni. „Í þessu sambandi vill stjórn Læknafélags Íslands benda á að fáar framfarir í læknisfræði hafa bjargað jafnmörgum mannslífum og bólusetningar, en alvarlegar aukaverkanir vegna þeirra eru mjög fátíðar.“

Í ályktuninni er einnig tekið fram að nauðsynlegt sé að nægilega mörg börn séu bólusett til að halda alvarlegum smitsjúkdómum í samfélaginu í skefjum. Auk þess þurfi börn sem ekki megi bólusetja vegna heilsufarsvandamála að reiða sig á að nægilega stór hluti heilbrigða barna sé bólusettur.

„Stjórn Læknafélags Íslands hvetur foreldra og forráðamenn barna til að láta bólusetja börn sín samkvæmt þeim ráðleggingum sem í gildi eru hverju sinni og sjá má á heimasíðu Embættis landlæknis.“