Lubitz átti von á barni með kærustu sinni

Andreas Lubitz átti von á barni með kærustunni sinni, að því er þýskir miðlar greina frá í dag. Bild am Sonntag segir frá því að konan, sem starfaði sem kennari, hafi sagt nemendum sínum frá óléttunni fyrir nokkrum vikum.

Talið er að kærasta Lubitz, sem ekki hefur verið nafngreind í fjölmiðlum, hafi verið á leiðinni á slysstað í frönsku Ölpunum þegar henni bárust fregnir af því að talið væri að kærasti hennar væri grunaður um að hafa grandað vélinni viljandi.

Lubitz var í sambúð með konunni í Dusseldorf. Þá greinir Der Spiegel frá því að parið hafi jafnvel ætlað að giftast.

150 manns fórust í flugslysinu síðastliðinn þriðjudag. Afar erfitt hefur reynst að bera kennsl á líkin vegna þess að vélin skall á fjallinu af gríðarlegri hörku. Þó hefur nú tekist að greina lífsýni 78 farþega en rannsakendur neituðu því að líkamsleifar Lubitz hafi fundist.