„Einn daginn munu allir muna eftir nafni mínu“

Fyrrverandi kærasta Andreas Lubitz, flugmannsins sem grandaði farþegaþotu í frönsku ölpunum á þriðjudaginn, segir Lubitz hafa verið veikan á geði. Þýska blaðið Bild ræddi við konuna sem starfar sem flugfreyja.

„Hann sagði: „Einn daginn ætla ég að gera eitthvað sem breytir öllu kerfinu og allir munu muna eftir nafninu mínu,“ er haft konunni sem kölluð er Maria W.

Maria W segir þau Lubitz hafa verið saman í um fimm mánuði á síðasta ári. Hún segir Lubitz hafa þjáðst af martröðum og oftsinnis vaknað upp öskrandi, „Við erum að hrapa!“ Lubitz hafi hins vegar þróað með sér aðferðir til að koma í veg fyrir að fólk sæi hversu veikur hann væri.

Hún segir þau Lubitz oft hafa gist saman á hóteli, þar sem þau vildu ekki að upp kæmist um samband þeirra á vinnustaðnum. Hann hafi þó verið umhyggjusamur en kvíðinn vegna slæmra vinnuaðstæðna, fundið fyrir miklum þrýstingi í starfi og á stundum skort peninga.

Maria W segist hafa bundið enda á sambandið þar sem henni þótti Lubitz eiga í vandræðum með að stjórna tilfinningum sínum. „Við vorum stundum að ræða saman og svo skyndilega fór hann að öskra á mig. Ég var hrædd. Einu sinni lokaði hann sig inni á baðherberginu í langan tíma.“

Aðspurð um hversu veikur hann hafi í raun og verið verið segir hún: „Hann ræddi ekki mikið um veikindin, annað en að hann leitaði aðstoðar geðlæknis.“

Maria W segist hafa verið slegin þegar hún hafi fengið fréttirnar um að hann hafi grandað vélinni viljandi. Þá segist hann hafa verið mjög þunglyndur eftir að hafa gert sér grein fyrir því að andleg vandamál hans þýddu líklegast að hann gæti ekki orðið flugstjóri. „Hann vildi ekki viðurkenna að draumur hans um að verða flugstjóri myndi ekki rætast.“