Lubitz leyndi veikindum sínum

Saksóknarar í Dusseldorf segja að aðstoðarflugmaðurinn Andreas Lupitz hafi átt við veikindi að stríða. Skjöl sem fundust á heimili hans, benda til að hann hafi haldið veikindum sínum leyndum frá vinnuveitendum og samstarfsfélögum sínum.

Rannsakendur fundu ekki sjálfsvígsbréf né nein sönnunargögn sem benda til þess að Lupitz hafi brotlent vélinni af hugmyndafræði- eða stjórnmálafræðilegum ástæðum. Hins vegar fundust læknavottorð sem höfðu verið rifin í tætlur. Þar kom fram að hann hefði ekki átt að vera í vinnunni á þriðjudaginn vegna veikinda sinna.

Saksóknararnir tóku ekki fram hvaða veikindi um ræðir, samkvæmt Independent. Lupitz glímdi þó við þunglyndi fyrir um sex árum og þurfti að taka eins og hálfs árs frí frá námi sínu vegna þessa. Fjölmiðlar í Þýskalandi halda því einnig fram að hann hafi átt í sambandsvandræðum.