Höfnin hönnuð með Minecraft

Tölvuleikurinn Minecraft var notaður til að hanna skipulagshugmyndir fyrir austurhöfnina í Reykjavík. Hönnuðirnir eru frá níu til fjórtán ára og segja leikinn tilvalinn, enda úr nægum kubbum að velja. Fréttastofa Stöðvar tvö hitti þrjá "minecraftara" í dag.

Börn, frá átta til sautjánára hafa hannað með tölvuforritinu Minecraft skipulagshugmundir við austurhöfnina við Hörpu í Reykjavík. Verkefnið er í tengslum við Hönnunarmars en tæknisetur Skema sá um að halda vinnustofu með börnunum. Átján hugmyndir komu fram um hvaða starfsemi megi byggja þarna upp, svo sem sjávarlífssafn, pósthús, nýtt Kolaport, sundlaug, lögreglustöð og tívolí. Meðal hönnuða var Ásgrímur Gunnarsson 13 ára sem teiknaði tónlistarmiðstöð. „Það væri bæði hægt að flytja tónlist þar, læra tónlist þar og þess vegna hafa þar plötubúð líka. Þetta yrði stórt tónlistarsvæði, eins og framlenging af Hörpunni", sagði Ásgrímur.  

Sérstakt teikniforrit sem„ talar við" Minecraft var notað til að teikna út frá réttum stærðartölum. 



Nóg af kubbum til að hanna 

Verslunamiðstöð með búðum, veitingastöðum og ísbúð þar sem þemað er íslenskt hráefni og íslensk hönnun var hönnun Úlfs Atlasonar, 14 ára sem segir leikinn góðan til hönnunar. „Þetta eru náttúrulega kubbar og mjög auðvelt að búa til eitthvað. Það er mjög mikið úrval af kubbum til að byggja með", sagði hann. 

Ásgrímur og Úlfur hafa þrátt fyrir ungan aldur verið kennarar í Minecraft hjá Skema í tæplega þrjú á hvor. 



Eitthvað kósý 

Ásta Steindórsdóttir er 9 ára og bjó til Almenningsgarð með tónlistarsviði og leiktækjum. „Einn staðurinn hjá mér er að við gerðum svona leiktæki fyrir krakka. Þetta voru fjórir partar sem við teiknuðum og svo gerðum við svið í miðjunni. Í einum partinum var gosbrunnur og bekkur, eitthvað svona kósí. Svo gerðum við íslenska fánann úr blómum. Einn staðurinn var svo matsölustaður svona til að kaupa eitthvað að borða", sagði Ásta í fréttum Stöðvar 2 í kvöld.    

Allar hugmyndir krakkanna sem unnu í vinnusmiðju Skema verða sýnda í húsnæði þess við Síðumúla í Reykjavík næstkomandi laugardag.